Mitantara Sarah ahoana ny fiainana aty Helsinki

Ny volana Janoary 2016 aho no tonga teto Helsinki. Sahirankirana aho tany am boalohany satria avy hatrany dia notsenanin’ny hatsiaka sy ny andro maizina dia tena namolaka be mihitsy. Rehefa nandeha teny anefa ny fotoana dia zatra teny ihany e :) Niara nipetraka tamin’ny ankizy mpianatra hafa aho izay teratany Bresiliana. Nahafinaritra ny fiaraha moninay na dia maro aza no misedra olona eo amin’izy io noho ny fomba amam-panao izay samy manana ny azy sy ny “feeling” izay tsy voatery hitovy. Fianarana koa anefa ny fiainana ka dia manao izay marimaritra iraisana hatrany rehefa misy ny tsy fitovian kevitra.

Ny nahafinaritra ahy...

Tena milamina ny fiainana ao Helsinki na dia lafo aza! Tsy dia misy rotoroto loatra na eo amin’ny resaka fitaterana na eo amin’ny resaka fianarana. Ny tanàna sady madio no milamina, tsy mampitaintaina ny mandeha eny amin’ny arabe na atoandro na alina ary io no tena anisany naha tàmana ahy ;-), ny fandriam-pahalemana.

Ny Finlandais dia olona tsotra ary “sincère”. Manana fiainana mitokatokana zareo fa nefa rehefa mila fanampiana ianao dia tena manampy izy ireo.

Mahafinatra ihany koa ilay antsoina hoe “sauna” na dia natahotra kely ihany aza tany am boalohany :) 

Mahafinaritra ilay mahafantatra sy minamana amin’ny ankizy avy amin’ny firenena samy hafa. Nanana namana bresiliana, italiana, koreana, sinoa ary finlandais aho nanodidina ahy. Mahavariana ny maheno azy ireo mitantara ny kolontsaina sy ny fomba amam panaony avy.

Momba ny fianarana...

Mahafinaritra ny fomba fampianarana tao amin’ny Oniversite an’ny Helsinki. Nanamarika ahy loatra ny tena fandraisan’andraikitry ny mpampianatra rehefa tojo olana ny mpianatra, hita avy hatrany hoe tena manana antso ho amin’izany izy ireo satria tena tsy mikely soroka manampy rehefa misy zavatra tsy azo eo amin’ny lesona na olana eo amin’ny resaka fianarana, tena azo ifampiresahana tsara. Ny resaka “documentation” sy ny aterineto dia tena manampy betsaka amin’ny fianarana ihany koa. Afaka mampiasa izany avokoa ny mpianatra rehetra.

Ireo nanahirana ahy...

Voalohany, somary sahirana aho teo amin’ny resaka sakafo satria tsy dia tiako loatra ny sakafo teo an toerana. Rehefa te hanova sakafo dia mandeha any amin’ny unicafe izay trano fisakafoanana an’ny oniversite.

Ny ankabeazan’ny zavatra atao dia efa ilay hoe “en ligne” avokoa. Tena manampy ilay izy amin’ny lafiny iray fa indraindray mankaleo satria toa lasa tsy miaina natoraly intsony ny olombelona fa voafatotry ny teknolojia.

Fianarana hoy aho ny fiainana, ka na dia nisy aza ny zava tsarotra nanahirana dia manefy ho amin’ny ho avy avokoa ireny rehetra ireny ary mampitombo fahalalana sy fahamatorana...!

Kiitos Nina :) 

Mpianatra gasy taty Helsinki

Manahoana daholo ny any Madagasikara!

Aty aho aty Helsinki! Ity misy interview kely miaraka amin'ny mpianatra gasy.  Nianatra efatra volana aty i Narindra. Mahafinaritra be! :) 

Fa maninona no avy mianatra aty Finlandy ianao?

"Tonga mandrato fianarana aty aho satria malaza eran-tany Finlandy amin’ny resaka fintantanana ny ala sy ny zavaboary. Malaza iany koa fa ny universitén’i finlandy dia manolotra fianarana tsara kalitao sady feno hoan’ny mpianatra, ka mba te hahita sy hianatra ary hahazo tombotsoa amin’izany ny tenako mba entina hampandroso an’i Madagasikara."

Ahoana ny fianarana any Oniversiten’i Helsinki?

"Mahafinaritra ny mianatra ao amin’ny oniversitén’i Helsinki, ny mpampianatra mahay mampianatra, sady tsotra no mora ifanakalozana. Manarak’izany ny fitaovana ianarana ao koa tena raitra daholo ka tena manamora ny fianarana."

Aiza no mipetraka ianao? Ahoana ny trano?

"Ato amin’ny tranon’ny mpianatra eto Kamppi (aty am ville), adiresy Pohjoinen Rautatienkatu 29 A 315 ao no mipetraka, ny trano aloha antonony ny habeny e! fa tokony nisaraka ny trano fatoriana!"

Tsara ve ny sakafo? Mihinana inona?

"Ny sakafo aloha tena manahirana e, tsy hoe ratsy fa mety tsy mahazatra angamba e, mihinambary ihany matetika de asiana légume na trondro na hena tsindraindray, lafo be ny trondro sy hena aty Helsinki!"

Ahoana ny olona finlandais? Ary ny teny finnois?

"Ny finlandais aloha olona tsy be resaka e, raha tsy oe mamo, sady otran’ny tsy de tia tabataba ny fahitako azy, tia mitokatokana iany koa, nefa refa tena minamana aminy ianao tena mahafinaritra sady tsotra ry zareo. Nianatra teny finnois ihany aho fa saingy tena sarotra aloha ilay izy fa lainga lainga e, mba rehefa mahay kely dia efa mankasitraka e!"

Ahoana ny fiainana aty Finlandy? Misy zavatra hafahafa ve be?

"Ny fiainana amin’ny ankapobeny aloha milamina e, fa raha ny oe vidimpiaianana ndray dia tena faran’izay lafo. Ny zavatra hafahafa itako aloha dia ny fanaovana Sauna miaraka amin’ny fianakaviana e, itako somary hafahafa, eny e, mety amin’ilay kolontsaina tsy mitovy ngamba e!"

Mbola misy zavatra hafa tianao lazaina fa te hiteny ianao?

"Mahafinaritra i Helsinki, ny  Université koa tena raitra, ny mpianatra sy ny mpampianatra mahafinaritra, ny fiainana sy ny fianarana tsotra sady mahafinaritra no milamina, koa manentana ny mpianatra eran-tany fa indrindra ny malagasy mba hoavy andrato fianarana aty Helsinki, Finlandy.

Mankasitraka anao Nina."

Wohoo! Misaotra betsaka aminao, Narindra! :)